തിരുവനന്തപുരം: ശിങ്കാരത്തോപ്പ് കോളനിയില്‍ പൊലീസിനുനേരെ ആക്രമണം. ഫോര്‍ട്ട് സിഐ ജെ.രാകേഷിന് മര്‍ദനമേറ്റു. തലയ്ക്ക് പരുക്കേറ്റ സിഐയും മറ്റു രണ്ടു പൊലീസുകാരും ആശുപത്രിയില്‍ ചികിത്സ തേടി. ഇന്നു പുലര്‍ച്ചെ ഒരു മണിയോടെയായിരുന്നു സംഭവം.
മദ്യപിച്ച് സംഘര്‍ഷമുണ്ടാക്കിയവരെ നിയന്ത്രിക്കാനാണ് പൊലീസ് സിഐയും മൂന്നു പൊലീസുകാരും എത്തിയത്. പ്രായപൂര്‍ത്തിയാകാത്ത കുട്ടികള്‍ ഉള്‍പ്പെടെയുള്ളവര്‍ മദ്യപിച്ചശേഷം പരസ്പരം ഏറ്റുമുട്ടുകയായിരുന്നു ഇവിടെ. ഇവരെ നിയന്ത്രിക്കുന്നതിനിടെ പിന്നില്‍നിന്ന് എത്തിയ കുറച്ചുപേര്‍ ചേര്‍ന്നു സിഐയെ കമ്പി ഉപയോഗിച്ച് അടിക്കുകയായിരുന്നു. മറ്റു രണ്ടു പൊലീസ് ഉദ്യോഗസ്ഥര്‍ക്കും പരുക്കേറ്റു.
