കോന്നി: പേരുവാലിയിലെ ആരണ്യകം കഫേ കാട്ടാനയുടെ ആക്രമണത്തില്‍ തകര്‍ന്നു. കോന്നി -തണ്ണിത്തോട് റോഡില്‍ വനംവകുപ്പിന്റെ കീഴില്‍ പ്രവര്‍ത്തിക്കുന്ന കഫേയാണ് കാട്ടാനക്കൂട്ടം നശിപ്പിച്ചത്. കഴിഞ്ഞ ദിവസം രാത്രിയില്‍ ആണ് സംഭവം നടന്നത്. ശബ്ദം കേട്ട് എത്തിയ അടവി മുളംകുടിലിലെ വാച്ചര്‍മാര്‍ ആണ് ആനകളെ കണ്ടത്. ഇവര്‍ ആനക്കൂട്ടത്തെ ഓടിച്ച് വിടുകയായിരുന്നു.
കടയ്ക്കുള്ളില്‍ ഉണ്ടായിരുന്ന ഉന്തുവണ്ടി, ഗ്ലാസുകള്‍, പ്ളേറ്റുകള്‍, മറ്റു സാധനങ്ങള്‍, സാധനങ്ങള്‍ സൂക്ഷിച്ചിരുന്ന തത്കാലിക സ്റ്റോര്‍ റൂം, ഇരിപ്പിടം, മറയായി ഉപയോഗിച്ചിരുന്ന പ്ലൈ വുഡ്, മേല്‍ക്കൂര, തൂണുകള്‍ തുടങ്ങിയവ എല്ലാം കാട്ടാന നശിപ്പിച്ചു. കഫേയുടെ അടുക്കള ഭാഗം ആണ് കൂടുതലും നശിപ്പിച്ചത്. റോഡിലൂടെ പോയിരുന്ന ഇരുചക്ര വാഹന യാത്രക്കാരും ആനയെ കണ്ടതായി പറയുന്നു.
