നൂറനാട് : സ്‌കൂട്ടറില്‍ പൊലീസ് വാഹനത്തെ പിന്തുടര്‍ന്ന് എത്തിയയാള്‍ എസ്‌ഐയെ വാള്‍ ഉപയോഗിച്ചു വെട്ടി പരുക്കേല്‍പ്പിക്കുന്നതിന്റെ ദൃശ്യങ്ങള്‍ പുറത്ത്. നൂറനാട് പൊലീസ് സ്റ്റേഷനിലെ എസ്‌ഐ വി.ആര്‍.അരുണ്‍ കുമാറിനാണു (37) പരുക്കേറ്റത്. നൂറനാട് മുതുകാട്ടുകര എള്ളുംവിള സ്വദേശി സുഗതന്‍ (48) പിടിയിലായി. ഞായറാഴ്ച വൈകിട്ട് ആറിന് പാറ ജംക്ഷനില്‍ വച്ചാണു സംഭവമുണ്ടായത്.
വൈകിട്ട് പട്രോളിങ് ഡ്യൂട്ടിക്കായി പൊലീസ് വാഹനത്തില്‍ വരികയായിരുന്നു എസ്‌ഐ. പിന്നാലെ സ്‌കൂട്ടറിലെത്തിയ പ്രതി, പാറ ജംഷ്‌നില്‍ വച്ച് പൊലീസ് വാഹനത്തെ തടഞ്ഞു. തുടര്‍ന്ന് വാഹനത്തില്‍ നിന്ന് ഇറങ്ങിയ എസ്‌ഐയെ വാള്‍ ഉപയോഗിച്ച് വെട്ടാന്‍ ശ്രമിക്കുകയായിരുന്നു. ആക്രമണത്തില്‍ എസ്‌ഐയുടെ വിരലുകള്‍ക്കു പരുക്കേറ്റു. ബലപ്രയോഗത്തിലൂടെ എസ്‌ഐ തന്നെയാണു പ്രതിയെ പിടികൂടിയത്.
