കോട്ടയം: വഴി തെറ്റി എത്തിയ കാര്‍ ഒഴുക്കില്‍പെട്ടു. തോട്ടിലൂടെ ഒഴുകിയ കാര്‍ നാട്ടുകാര്‍ പിടിച്ചുകെട്ടിയതോടെ ഡോക്ടറുടെ കുടുംബം അദ്ഭുതകരമായി രക്ഷപ്പെട്ടു. 6 മാസം പ്രായമുള്ള കുഞ്ഞും കാറിലുണ്ടായിരുന്നു. ഇന്നലെ രാത്രി 11നു തിരുവാതുക്കലിനു സമീപം പാറേച്ചാലിലാണ് സംഭവം. എറണാകുളത്തുനിന്നു തിരുവല്ലയിലേക്ക് യാത്ര ചെയ്ത കുമ്പനാട് സ്വദേശികളായ ഡോ.സോണിയ (32), അമ്മ ശോശാമ്മ (65), സഹോദരന്‍ അനീഷ് (21), സോണിയയുടെ 6 മാസം പ്രായമുള്ള കുഞ്ഞ് എന്നിവരാണു രക്ഷപ്പെട്ടത്.
രാത്രി വൈകി എറണാകുളത്തുനിന്നു യാത്ര തിരിച്ച കുടുംബം ഗൂഗിള്‍ മാപ്പിന്റെ സഹായത്തോടെ സഞ്ചരിക്കുന്നതിനിടെ തിരുവാതുക്കല്‍ നിന്ന് വഴിതെറ്റിയാണ് പാറേച്ചാലില്‍ എത്തിയതെന്ന് പൊലീസ് പറഞ്ഞു. തിരുവാതുക്കല്‍-നാട്ടകം സിമിന്റുകവല ബൈപാസിലൂടെ പാറേച്ചാല്‍ ബോട്ടുജെട്ടിയുടെ ഭാഗത്തേക്കാണ് കാര്‍ നീങ്ങിയത്. ഈ ഭാഗത്ത് റോഡില്‍ ഉള്‍പ്പെടെ കുത്തൊഴുക്കായിരുന്നു. റോഡും തോടും തിരിച്ചറിയാന്‍ കഴിയാത്ത സാഹചര്യമായിരുന്നു.
പാറേച്ചാല്‍ ജെട്ടിയുടെ സമീപത്ത് എത്തിയപ്പോള്‍ കൈത്തോട്ടിലേക്ക് പതിച്ച കാര്‍ ഒഴുകിനീങ്ങി. യാത്രക്കാര്‍ നിലവിളിക്കുകയും വശങ്ങളിലെ ചില്ലില്‍ ഇടിച്ച് ശബ്ദം ഉണ്ടാക്കുകയും ചെയ്തതോടെ നാട്ടുകാരുടെ ശ്രദ്ധയില്‍പെട്ടു. നാട്ടുകാരായ സത്യന്‍, വിഷ്ണു എന്നിവരാണ് ആദ്യം എത്തിയത്. കാറിനൊപ്പം കരയിലൂടെ ഓടിയ ഇവര്‍ കാറിനു സമീപം എത്തിയപ്പോള്‍ വെള്ളത്തിലേക്ക് ചാടുകയായിരുന്നു.
കാര്‍ 300 മീറ്റര്‍ ഒഴുകിനീങ്ങി. കാര്‍ കരയിലേക്ക് തള്ളിനീക്കാന്‍ ശ്രമിക്കുന്നതിനിടെ മുന്‍ഭാഗം ചെളിയില്‍ തറഞ്ഞു. ഇതോടെ നാട്ടുകാര്‍ കയറിട്ടു കാര്‍ സമീപത്തെ വൈദ്യുതത്തൂണില്‍ ബന്ധിച്ചു. വാതില്‍ തുറന്ന് കുഞ്ഞിനെയും മറ്റുള്ളവരെയും പുറത്ത് എത്തിച്ചു. യാത്രക്കാരെ സമീപത്തെ സനലിന്റെ വീട്ടില്‍ എത്തിച്ചു പ്രാഥമിക ശുശ്രൂഷ നല്‍കി. പരുക്കുകളില്ല. പിന്നീട് രാത്രിയില്‍ എത്തിയ ബന്ധുക്കളോടൊപ്പം ഇവര്‍ മടങ്ങി. പൊലീസും അഗ്‌നിരക്ഷാ സേനയും എത്തിയിരുന്നു.
