അബുദാബി: അബുദാബി ബിഗ് ടിക്കറ്റ് നറുക്കെടുപ്പിന്റെ 25 ദശലക്ഷം ദിര്‍ഹത്തിന്റെ (ഏതാണ്ട് 50 കോടിയിലേറെ രൂപ) സമ്മാനം മലപ്പുറം സ്വദേശിയായ ഹരിദാസന്. ബിഗ് ടിക്കറ്റിന്റെ 235 സീരീസ് നറുക്കെടുപ്പാണ് ഹരിദാസനും 10 സുഹൃത്തുക്കള്‍ക്കും പുതുവര്‍ഷത്തില്‍ വമ്പന്‍ ഭാഗ്യം കൊണ്ടുവന്നത്.
അബുദാബിയില്‍ ഡ്രൈവറായി ജോലി ചെയ്യുകയാണ് ഹരിദാസന്. 2008 മുതല്‍ ഇദ്ദേഹം യുഎഇയിലുണ്ട്. ഡിസംബര്‍ 30ന് എടുത്ത 232976 എന്ന നമ്പറിലെ ടിക്കറ്റാണ് ഭാഗ്യം കൊണ്ടുവന്നത്. ബിഗ് ടിക്കറ്റിന്റെ ഇതുവരെയുള്ളതില്‍ ഏറ്റവും വലിയ സമ്മാനത്തുകയാണിത്. രണ്ടാം സമ്മാനമായ രണ്ടു ദശലക്ഷം ദിര്‍ഹം നേടിയ അശ്വിന്‍ അരവിന്ദാക്ഷനും ഇന്ത്യക്കാരനാണ്.
