അടൂര്‍: മോഷ്ടിച്ച് ബൈക്കുകളുമായി ആക്രിക്കടക്കാര്‍ക്ക് വില്‍ക്കാനെത്തിയ രണ്ടു യുവാക്കളെ പോലീസ് കസ്റ്റഡിയില്‍ എടുത്തു. ആക്രി വില്‍പ്പനക്കാര്‍ക്ക് തോന്നിയ സംശയമാണ് പ്രതികളെ കുടുക്കിയത്. ഇതില്‍ ഒരാള്‍ക്ക് പതിനേഴു വയസ് മാത്രമാണുള്ളത്. കൊട്ടാരക്കര പുലമണ്‍ രഞ്ജുഭവനില്‍ രഞ്ജു(24), കൊട്ടാരക്കര പള്ളിക്കല്‍ സ്വദേശി (17) എന്നിവരെയാണ് വ്യാഴാഴ്ച വൈകിട്ട് ആറു മണിയോടെ അടൂര്‍ പൊലീസ് കസ്റ്റഡിയില്‍ എടുത്തത്.
പഴകുളത്തുളള ആക്രിക്കടയിലാണ് പ്രതികള്‍ വാഹനവുമായി വന്നത്. രഞ്ജു കൊണ്ടു വന്നത് കെഎല്‍ 24 എല്‍ 2514 ഡിസ്‌കവര്‍ ബൈക്കും പതിനേഴുകാരന്‍ കൊണ്ടു വന്നത് കെഎല്‍ 24 ജി 6378 റോയല്‍ എന്‍ഫീല്‍ഡ് ബൈക്കുമാണ്. ആക്രിക്കടക്കാരന് സംശയം തോന്നി പൊലീസില്‍ അറിയിച്ചു. സ്ഥലത്ത് വന്ന പൊലീസ് ചോദ്യം ചെയ്തപ്പോഴാണ് മോഷ്ടിച്ചതാണ് എന്ന് വ്യക്തമായത്. റോയല്‍ എന്‍ഫീല്‍ഡ് കുണ്ടറയില്‍ നിന്നും മോഷ്ടിച്ചതാണെന്ന് പ്രതികള്‍ പറഞ്ഞു.
കസ്റ്റഡിയില്‍ എടുത്ത പ്രതികളെ പൊലീസ് ചോദ്യം ചെയ്തു വരികയാണ്. ഇവര്‍ വേറെയും വാഹനങ്ങള്‍ മോഷ്ടിച്ചിട്ടുണ്ടോയെന്ന് പരിശോധി്ക്കും.
