നെടുങ്കണ്ടം: തൂക്കുപാലത്ത് അടിച്ചു ഫിറ്റായ യുവതി മദ്യം തന്നവനെയടക്കം ഒരു പറ്റം യുവാക്കളെ തൂക്കിയടിച്ചു. സ്ഥലത്ത് വന്ന പൊലീസ് അടികൊണ്ടവനെതിരേ കേസെടുത്തു. യുവതിയുടെ ആക്രമണത്തില്‍ യുവാക്കള്‍ക്ക് പരുക്കേറ്റു. തൂക്കുപാലം ബിവറേജ് കോര്‍പ്പറേഷന്‍ ഔട്ട്ലെറ്റിലാണ് സംഭവം.
ഔട്ട്‌ലെറ്റില്‍ നിന്നും മദ്യംവാങ്ങിയ യുവതി അപ്പോള്‍ തന്നെ അത് കഴിച്ചു തീര്‍ത്തു. തൊട്ടപ്പുറത്തിരുന്ന മദ്യപിക്കുകയായിരുന്ന യുവാക്കളുടെ അടുത്ത് ചെന്ന് അവരില്‍ നിന്നും മദ്യം വാങ്ങി കഴിച്ചു.ഇതിനിടെ മദ്യപ സംഘത്തിലെ ഒരു യുവാവുമായി ഉടക്കായി. പിന്നാലെ അടി പൊട്ടി. തടയാന്‍ ചെന്ന യുവാക്കളെ മുഴുവന്‍ യുവതി അടിച്ചു. അടി കൊണ്ടാണ് യുവാക്കള്‍ക്ക് പരുക്ക്.
വിവരമറിഞ്ഞ് സ്ഥലത്തെത്തിയ നെടുങ്കണ്ടം പോലീസ് യുവതിയെ പിടിച്ചുമാറ്റാന്‍ ശ്രമിച്ചെങ്കിലും ഫലമുണ്ടായില്ല. തുടര്‍ന്ന് യുവതിയുടെ വീട്ടുകാരെ വിളിച്ചു വരുത്തി. വനിതാ പോലീസും ജനപ്രതിനിധികളും ചേര്‍ന്ന് യുവതിയെ ഓട്ടോറിക്ഷയില്‍ കയറ്റിയെങ്കിലും വീട്ടുകാര്‍ സ്ഥലത്തെത്തി ഇവരെ മറ്റൊരിടത്തേയ്ക്ക് മാറ്റി.
യുവതിയ്ക്ക് മദ്യം നല്‍കിയ യുവാവിനെ നെടുങ്കണ്ടം പോലീസ് ചോദ്യം ചെയ്യുന്നതിനായി പോലീസ് സ്റ്റേഷനില്‍ എത്തിച്ചു. കാലില്‍ പരുക്കേറ്റതിനാല്‍ പിന്നീട് ആശുപത്രിയിലേക്ക് മാറ്റി.
