പനജി: ഐഎസ്എല്ലില്‍ ജംഷഡ്പുര്‍ എഫ്‌സിക്കെതിരെ കേരള ബ്ലാസ്റ്റേഴ്‌സിന് തോല്‍വി (3-0). പെനല്‍റ്റി സ്‌പോട്ടില്‍നിന്നു 2 തവണ ലക്ഷ്യം കണ്ട ഗ്രെഗ് സ്റ്റിവര്‍ട്ട് (45′, 48′), ഡാനിയല്‍ ചീമ ചുക്വു (53′) എന്നിവരാണു ജംഷഡ്പുരിന്റെ സ്‌കോറര്‍മാര്‍. ആദ്യ പകുതിയുടെ 20 മിനിറ്റ് സമയം പ്രതിരോധത്തില്‍ ഊന്നിക്കളിച്ച ബ്ലാസ്റ്റേഴ്‌സ് പിന്നീടു കളിയുടെ നിയന്ത്രണം ഏറ്റെടുത്തെങ്കിലും ആദ്യ പകുതി അവസാനിക്കുന്നതിനു തൊട്ടു മുന്‍പു ജംഷഡ്പുര്‍ നേടിയ പെനല്‍റ്റി മത്സരത്തിന്റെ ഗതി മാറ്റി.
ജംഷഡ്പുര്‍ മധ്യനിര താരം ഗ്രെഗ് സ്റ്റിവര്‍ട്ടിനെ ബ്ലാസ്റ്റേഴ്‌സ് പ്രതിരോധനിര താരം ദിനെചന്ദ്രം മെയ്‌തേയ് അനാവശ്യമായി ബോക്‌സിനുള്ളില്‍ വീഴ്ത്തിയതാണു തിരിച്ചടിയായത്. കിക്കെടുത്ത സ്റ്റിവര്‍ട്ടിനു പിഴച്ചില്ല (1-0).
