തൃശൂര്‍: നടുറോഡില്‍ ഓണം ആഘോഷിച്ച് തൃശൂര്‍ വടക്കേക്കാട് പൊലീസ്. പൊലീസ് സ്റ്റേഷനു മുന്നിലെ റോഡില്‍ കസേരകളിയും വടംവലിയും നടത്തിയതിന്റെ ദൃശ്യങ്ങള്‍ പുറത്തുവന്നു. വടക്കേക്കാട് സ്റ്റേഷനിലെ എസ്എച്ച്ഒയുടെ വാട്‌സാപ് സ്റ്റാറ്റസിലാണ് ദൃശ്യങ്ങള്‍ ആദ്യം പ്രത്യക്ഷപ്പെട്ടത്. സംഭവം വിവാദമായതിനു പിന്നാലെ സ്റ്റാറ്റസ് നീക്കം ചെയ്തു. അതേസമയം, തിരക്കുള്ള റോഡ് ആയിരുന്നില്ലെന്നാണ് മേലുദ്യോഗസ്ഥരുടെ വിശദീകരണം.
ഗതാഗതം തടസപ്പെടുത്തി ഓണാഘോഷം നടത്തിയതിന് മലപ്പുറം പരപ്പനങ്ങാടി കോഓപറേറ്റീവ് കോളജിലെ വിദ്യാര്‍ഥികള്‍ക്കുനേരെ പൊലീസ് ലാത്തിവിശീയിരുന്നു. 50 ലധികം വിദ്യാര്‍ഥികള്‍ക്കെതിരെ കേസെടുക്കുകയും ചെയ്തിരുന്നു. ഇതിനിടെയാണ് പൊലീസിന്റെ നടുറോഡിലെ ഓണാഘോഷത്തിന്റെ ദൃശ്യങ്ങള്‍ പുറത്തുവന്നത്.
