പാലക്കാട്: മുഖ്യമന്ത്രിക്കെതിരെ നടത്തിയ വെളിപ്പെടുത്തലുകള്‍ക്കു പിന്നാലെ സരിത്തിനെ പിടിച്ചുകൊണ്ടുപോകുമെന്ന് ഷാജ് കിരണ്‍ പറഞ്ഞിരുന്നതായി സ്വര്‍ണക്കടത്തു കേസിലെ പ്രതി സ്വപ്ന സുരേഷ്. ‘എടോ സരിത്തേ, ഇയാളെ നാളെ പൊക്കും..’ എന്നാണ് ഷാജ് കിരണ്‍ തലേദിവസം രാത്രി പറഞ്ഞതെന്നു സ്വപ്ന മാധ്യമങ്ങളോട് വ്യക്തമാക്കി.
‘ഇതിനു പിന്നാലെയാണ് സരിത്തിനെ തട്ടിക്കൊണ്ടുപോകുന്നത്. ഇതില്‍നിന്ന് എന്തു മനസ്സിലാക്കണം? കൊണ്ടുപോയത് വിജിലന്‍സ് ആണെന്ന് മീഡിയ റിപ്പോര്‍ട്ട് ചെയ്യും മുന്‍പ് തന്നെ ഷാജ് എന്നോട് പറഞ്ഞു. ഇതില്‍ നിന്നും വ്യക്തമല്ലേ എല്ലാം. മണിക്കൂറുകളോളം എന്നെ മാനസികമായി പീഡിപ്പിക്കുകയായിരുന്നു. ഒട്ടേറെ കേസുകള്‍ തലയില്‍ വച്ചുതരുമെന്നും അറസ്റ്റ് ഉണ്ടാകുമെന്നും പറഞ്ഞ് ഭീഷണിപ്പെടുത്തി. എല്ലാറ്റിന്റെയും വോയിസ് ക്ലിപ് കയ്യിലുണ്ട്. നാളെ പുറത്തുവിടും.’ – സ്വപ്ന പറഞ്ഞു.
ഷാജ് കിരണ്‍ അടുത്ത സുഹൃത്താണെന്നും താന്‍ വിളിച്ചിട്ടു തന്നെയാണ് ഷാജ് കിരണ്‍ പാലക്കാട്ട് വന്നതെന്നും സ്വപ്ന പറഞ്ഞു. തന്നെ മാനസികമായി തളര്‍ത്തി കേസ് ഒത്തുതീര്‍പ്പാക്കാന്‍ ഷാജ് ശ്രമിച്ചതായി സ്വപ്ന ആരോപിച്ചു. മുഖ്യമന്ത്രിയുടെ ശബ്ദമായ നികേഷ് കുമാറിനോട് സംസാരിക്കണമെന്ന് ഷാജ് കിരണ്‍ പറഞ്ഞു. കോടതിയില്‍ നല്‍കിയ രഹസ്യമൊഴി പിന്‍വലിക്കണമെന്ന് ഷാജ് കിരണ്‍ ആവശ്യപ്പെട്ടെന്നും സ്വപ്ന ആവര്‍ത്തിച്ചു.
