മുംബൈ: ആരാണു മുണ്‍മുണ്‍ ധമേച്ഛ? മുംബൈ തീരത്ത് ആഡംബര കപ്പലിലെ ലഹരിവിരുന്ന് കേസില്‍ ബോളിവുഡ് സൂപ്പര്‍താരം ഷാറുഖ് ഖാന്റെ മകന്‍ ആര്യന്‍ ഖാനൊപ്പം അറസ്റ്റിലായതോടെയാണു മുണ്‍മുണ്‍ ആരാണെന്ന് ഏവരും ചോദിച്ചു തുടങ്ങിയത്. കേസുമായി ബന്ധപ്പെട്ട് ഇന്റര്‍നെറ്റില്‍ കഴിഞ്ഞദിവസം ഏറ്റവും കൂടുതല്‍ തിരയപ്പെട്ട പേരുകളിലൊന്നും ഇവരുടേതാണ്. മോഡലും സമൂഹമാധ്യമ സെലിബ്രിറ്റിയുമായ മുണ്‍മുണ്‍ ധമേച്ഛ, വ്യവസായ കുടുംബത്തിലെ അംഗമാണ്.
കേസില്‍ എട്ടുപേരെയാണു നര്‍കോട്ടിക്‌സ് കണ്‍ട്രോള്‍ ബ്യൂറോ (എന്‍സിബി) അറസ്റ്റ് ചെയ്തത്. വ്യവസായിയുടെ മകളാണു മുണ്‍മുണ്‍. ലഹരിമരുന്ന് കൈവശം വച്ചതിനും ഉപയോഗിച്ചതിനുമാണ് കേസ്. ചാറ്റുകളടക്കമുള്ള വിവരങ്ങള്‍ പരിശോധിക്കാന്‍ ആര്യന്‍ ഖാന്റെ മൊബൈല്‍ ഫോണ്‍ പിടിച്ചെടുത്തു. ശനിയാഴ്ച മുംബൈയില്‍നിന്നു ഗോവയിലേക്കു പുറപ്പെട്ട കോര്‍ഡിലിയ എന്ന കപ്പലിലായിരുന്നു ലഹരിവേട്ട. രഹസ്യവിവരത്തെത്തുടര്‍ന്ന് എന്‍സിബി ഉദ്യോഗസ്ഥര്‍ യാത്രക്കാരെപോലെ കയറുകയായിരുന്നു. കപ്പല്‍ പുറംകടലില്‍ എത്തിയപ്പോഴായിരുന്നു വിരുന്ന്.
